Boris Johnson ka refuzuar të heqë kërkesat për viza për ukrainasit që ikin nga vendi pasi forcat ruse vazhduan të bombardojnë qytetet e Ukrainës.

Bashkimi Evropian ka lejuar udhëtimin pa viza për ukrainasit, por kryeministri i Mbretërisë së Bashkuar këmbënguli se Mbretëria e Bashkuar kishte të drejtë që kërkonte plotësimin e dokumenteve.

“Ne kemi tashmë 1000 persona në skemën ekzistuese, ky numër do të rritet shumë ndjeshëm. Askush nuk është larguar”, tha Johnson.

Sipas tij  kontrollet e sigurisë ishin jetike për të parandaluar hyrjen e agjentëve rusë në Mbretërinë e Bashkuar.

“Ne e dimë se sa i paskrupullt mund të jetë Putini në metodat e tij, nuk do të ishte e drejtë ta ekspozojmë këtë vend ndaj rrezikut të panevojshëm të sigurisë dhe ne nuk do ta bëjmë këtë. Ne do të jemi aq bujarë sa të mundemi, por duhet të kemi kontrolle”, tha ai.

Ndërkohë, sekretari i mbrojtjes Ben Wallace premtoi pajisje shtesë ushtarake për forcat ukrainase, me furnizime të reja të raketave antitank dhe mundësinë e sistemeve kundërajrore./arbresh.info/